स्वतन्त्रताक परिभाषित करबाक क्रममे विद्वान लोकनि भाषिक स्वतन्त्रताक बात प्रमुखताक संग उठबैत छथि । एहि विचारक केन्द्रमे मातृभाषा अछि । स्वतन्त्रता आ परतन्त्रता बीचक अन्तर एकटा मिहिन रेखाद्वारा होइत छै । हमसभ ओहि रेखाकेँ चिन्हित करबामे धोखा खाइत रहलहुँ अछि तें सहजतासँ हमरा लोनिकपर कोनो वाह्य सैनिक आ भाषिक आक्रान्ता नियन्त्रण करैत रहल ।
ई प्रमाणित तथ्य छै जे ज्ञान आर्जनक माध्यम मातृभाषा होइक त बिनु मातृभाषाक माध्यमसँ ज्ञान आर्जन कएनिहार प्रतिस्पर्धा नइ क’ सकैए । मिथिलाबासी मैथिलीभाषी एखन ओहने अवस्थामे अछि । ज्ञान–विज्ञानक ई भूमि ओजहीन भेल जा रहल अछि । जे संसारकेँ अपन ज्ञानसँ चमत्कृत कएने छल ओ एखन सभसँ बेसी अशीक्षितक भूमि बनि गेल अछि । प्रतिस्पर्धाक मनोबल आ क्षमतामे ह्रास आबि गेल छै । समय दूर बहुत दूर निकलल जा रहल छै ।
पता नइ कोना ने कोना बि.सं. २०५४ सालमे हम जिल्ला विकास समिति धनुषाक सदस्य पदमे चुनाव लड़लहुँ आ निर्वाचित भेलहुँ । स्थानीय स्वायत्त शासन ऐन लागु भ’ चुकल रहै । हमरा सभक जननिर्वाचित ओ समूह जे कि मुख्य रुपमे नेपाल कम्युनिष्ट पार्टी एमाले आ नेपाली काँग्रेससँ सम्वद्ध छल तकर स्पष्ट मान्यता छलै जे कानूनी अधिकारक प्रयोगमे हिचकिचाहट नइँ होएबक चाही । स्वायत्त शासन ऐनक प्रावधान अनुसार हमसभ धनुषा जिल्लाक बहुसंख्यक नागरीकक भाषा मैथिलीकेँ सेहो कामकाजक भाषाक रुपमे प्रयोग करबाक निर्णय केलियै । जिल्ला विकास समिति आ फेर जिल्ला विकास परिषद् जकर सदस्य एक सय एक गाबिसकेँ अध्यक्ष आ उपाध्यक्ष होइत छलै, सर्वसम्मतिसँ निर्णय कएल गेलै । मुदा सर्वाेच्च अदालतमे एकटा  निषेधाज्ञा मुद्दा देल गेलै जे नेपालक संविधान विरोधी ई निर्णय छै आ तें खारेज कएल जाए । खारेज भ’ गेलै । तात्कालीन अवस्थामे काठमाण्डौं नगरपालिका, जिल्ला विकास समिति धनुषा, जनकपुर नगरपालिका, राजविराज नगरपािलका आ किर्तिपुर नगरपालिका एहन निर्णय कएने छल । सर्वाेच्च अदलतमे जिल्ला विकास समिति धनुषा आ काठमाण्डौ नगरपािलका मात्र वारेश सहित मुकदमा लडने छल, हमर सौभाग्य जिबिस धनुषाक वारेशक रुपमे हम प्रत्यक्ष रुपें ओ मुद्दा लड़लहुँ । हराओल गेलै । स्वायत्त शासन ऐनद्वारा प्रदत अधिकारक हत्या भेलै । नेपालक मातृभाषी ओहि दिनके एखनो काला दिनकेँ रुपमे स्मरण करैत आएल अछि ।
एहि निराशाक अवस्थासँ बाहर निकलबाक हेतु मैथिली विकास कोषक स्थापना कएल गेलै । हमरे संयोजकत्व गठित समिति एहि संस्थाक विधान आ आर्थिक श्रोतक आधार निर्माण कएने छल । जिबिसकेँ आर्थिक सहयोगमे स्वतन्त्र संस्थाक कानूनी प्रक्रिया पूरा क’ कोषक स्थापना कएल गेलै । स्थापनकालीन समितिक चयन सेहो जिबिस धनुषा कएने छल ।
किछु अवरोध आ गत्यारोध बाद ई कोष अत्यन्त सक्षमताक संग आगु बढि़रहल अछि । मैथिलीक नेतृत्वदायी संस्थाक रुपमे कोष परिचय बनौलक अछि । जिल्लासँ राष्ट्र आ राष्ट्रसँ अन्तराष्ट्रिय स्तर धरि अपन आ अपना मातृभाषाक बिस्तारमे कोष सफल भेल अछि । निश्चित रुपें एखनुक अध्यक्ष जीवनाथ चौधरी आ हुनक कार्यसमितिक ई श्रेय जाइत छन्हि । हम तात्कालीन जिबिस सभापति रामचरित्र साह सहित सम्पूर्ण पदाधिकारीप्रति आभार व्यक्त करैत छी जे तात्कालीन अवस्थामे अपन मातृभाषा, मातृसंस्कृतिक लेल एतेक गम्भिरता देखौलनि । नेपालक जननिर्वाचित निकाय एखनोधरि भाषा संस्कृतिक बिषयमे संवेदनशीलताक नइ देखा पाबि रहलअछि । जखन की एखन संवैधानिक अधिकार स्थानीय तहमे छै आ कोनो न्यायालय ओहि निर्णयपर नियन्त्रण नइ क’ सकै छै । अन्तमे एहि कार्यक सम्पादनमे सहयोग कएनिहार सभप्रति आभार ।